Dinto ‘o presepe
all’osteria do vico a’ speranzella
nce stanno quatto cuochi:
uno ntento a frje nta na tiella,
n’ato ca accuomoglia
e scuommoglia caccavelle
e ati due ca fellano patane
vevennose ‘nu quarto e vino.
Sta sera se parla d”a patella
chi dice ca le piace
chi ca sape solo e terra:
-Ca qua’ terra è mare !
Va buo’ è scoglio ma nun è ‘rena-,
Quanno po’ si avvia a parlà ‘e Maria
a bella ca sta a’ salita d”a ‘renella,
‘o primo cuoco affoga nu purpo
n’ato s’assapora na nucella
– A me me piace riccia –
dice, da reto na sartania
ma sicuro non parla ‘e sfugliatella
– Nera come st’auliva – e s’accannarea.
-Io la voglio grassa, comme sta polanchella –
‘o cchiù curto parla e le coce la ventrella.
– Con la pelle cchiù janca ‘e na muzzarella –
dice lo quarto cocenno na sardella.
All’osteria nce lavora pure Antunietta
a figlia ‘e masto Lucio ‘o vasaro
e pare proprio n’anforetta
‘e chelle che ‘o pate
fa ch’’e mane.
L’avissava vere quann’è bella
co li trezze legate a tuppo
mentre scopa nterra
e votta l’acqua p’’a saponata
da reto ‘o furno c’è Tatore
‘o pizzaiolo che a spia c’’a pala mano
mentre la fiamma avvampa
e nun se sa s’è fuoco o s’è passione.
A nu tavolo quattro sfaccenate
jocano a carte e danno fondo
a na fiasca e vino rosso
o cchiù sfrontato jastemma forte
-Pe’ San Donato,
ma nun ‘o viri ca sto piombo a sto palo?-
A nu balconcino ‘e fierro na sposa,
ancora c’’a vestaglia, fore na stanza
annaffia na testa ‘e geranio
lontano ‘o marito ca scoppetta
fischiettando se ne va alla foresta.
Arreto a nu muro ‘o spasimante
se strugge e tenerezza
volesse stregne ‘a sposa,
‘a stanza e ‘o ciore,
ma le manca ‘o coraggio
e nu core sognatore
dinto ‘o presepe nce trovate ‘e tutto
cristiane e animale
potente e puverelle
belli e brutti
si verite buono, nce state pure vui
e site proprio tutte.